我係咪太港女？

Nobodycantalkto

男朋友大我10年，工作多年；我半工讀緊master。一起咗一年。

男朋友樣樣野都好照顧我，例如我嚟m會買m巾又會整紅糖水俾我、晚晚收工好攰都會搵我食飯，佢講明以結婚為前提同我係埋一齊。

身邊好姊妹男朋友對佢哋都好好，有時候一班女仔圍埋就會講自己男朋友對自己點，聽到佢哋講男朋友會幫佢哋買保險又會滿足佢哋要求買奢侈品俾佢哋，好姊妹就反問我男朋友會唔會捨得買俾我，我自己本來就對袋冇咩追求，但俾佢哋講得多都想試探下自己男朋友對自己捨唔捨得洗錢。

就係咁我以試探嘅心態問我男朋友會唔會買果啲貴嘢俾我，佢就避免唔講，佢話係咪真有需要去買呢啲嘢，佢話佢覺得追求奢侈品嘅人有好多係自卑所以要用貴野去托起自己。雖然佢講得好有道理，但我啲朋友話如果一個男人真係愛你就會滿足你要求，就算係冇道理，又同我講一個肯為你洗錢嘅男人唔一定愛你，但唔肯為你洗錢嘅一定唔愛你。呢啲說話聽多，心真係好煩，日日都係到問自己佢係唔係真心愛我㗎，點解口口聲聲話愛我又唔可以好似其他人嘅男朋友咁咁大方呢？

求各位sis意見

YYYYU

唔肯為你駛錢嘅一定唔愛你，但都要駛响值得嘅地方，唔係買奢侈品名牌袋。
你做人女朋友，有冇為個男仔諗下？佢有冇咁嘅經濟能力同你買保險同奢侈品？你想佢買名牌袋畀你，定係儲錢結婚，為未來生活打算？
一齊一年就謀住人啲錢，我係個男就會重新考慮係咪仲應該以結婚為前提同你一齊。

icecreamv3v

感覺你都唔係好愛你男友

ot103to

其實都幾港女心態

Nobodycantalkto

YYYYU 發表於 2020-10-27 10:09
唔肯為你駛錢嘅一定唔愛你，但都要駛响值得嘅地方，唔係買奢侈品名牌袋。
你做人女朋友，有冇為個男仔諗下 ...

其實我一開始都冇咁諗，但我身邊嘅女性朋友係到俾說話我聽，搞到我就有好多疑惑。唉，我都知愛情係兩個人嘅事，但冇比較就冇傷害，我啲朋友成日係我面前曬命，心真係唔多唔少會唔舒服。自問我唔係一個物質嘅人，出去食飯我都會自覺睇下價錢，貴嘅就唔叫，或者搶俾錢。我只係想知道佢對我嘅心意，先用呢啲方法去試探，淨係想要佢一個態度，而唔係真係要佢買或者付出好多。

靈靈@hk

你只看到人地男友好的一面，咁衰嗰面呢？你d frd有無講？

要同朋友比較來衡自己的幸福，除非你仲係學生啦，否則如果你已經係成年人的話咁你自我認同感都好低。

靈靈@hk

但我啲朋友話如果一個男人真係愛你就會滿足你要求，就算係冇道理

男人唔肯為你洗錢嘅一定唔愛你，無錯，但前提係真的有必要使的錢囉。如果你要他去做鴨賺錢買手袋，佢係咪要照做先代表愛你？

真心建議你搵番d智商高少少的朋友

YYYYU

Nobodycantalkto 發表於 2020-10-27 16:32
其實我一開始都冇咁諗，但我身邊嘅女性朋友係到俾說話我聽，搞到我就有好多疑惑。唉，我都知愛情係兩個人 ...

咁唔信任，要用呢D on9 方法去試探對方嘅心意，你呢個態度先至有問題。

寂寞的少女

其實比較下既愛情邊會開心的。
你男朋友大你10年唔係件事既重點
關係先係兩個人既重點

ngaichingyuiching

睇你自己需要既係咩野
唔可以下下人地講咩野，就即刻去拎把尺去比較....

陳喵喵

講先Quit 咗班8婆friends ))))

非法改裝嬰兒車

其實樓主本來係咩人,就算換過晒班朋友,都只係換成另一班差唔多質素的人
定係呢個建議冇諗埋呢樣??
但我地呢D花生友邊理得咁多呢??

LaLaLai

你仲話你讀master，用下個腦諗下啦。

Mrslittlepig

肯為你洗錢但最終會離開你既咁點計?
肯為你洗錢但會出軌既又點計?
讀到master智商仲成個細路咁 你覺得錢代表所有野?你地講一講你就懷疑男朋友
捨得洗錢係女人身上就叫愛佢咁好多人唔洗分手/離婚啦

lushgirlcoly

樓主希望妳思想上會學懂長大，你年紀還小，覺得男友錫自己嘰定義在於佢肯為妳付出幾多，其實當你10年後，回看返自己，如果錯失了一個錫你嘰男人，你會好後悔，因為再老d就遇上有條件又對自己好嘰男人相對係好小，當你地步向結婚果時，其實要預備嘰錢是:買樓?供/租樓?籌備結婚事宜?其實呢個階段你未必會諗，但去到果個階段，講緊兩人要儲嘰錢是幾十萬以上咁計，除非你男友本身屋企有錢而肯比錢出來，又或者你男友搵好多錢已經負擔得起，又或者你覺得結婚不要搞太多，簽紙就可以，香港地是很現實，但你諗諗日後如果男友冇工作，你又肯唔肯同佢挨世界呢？看妳寫的M到他會為妳付出，我見妳男友真心很好，不要因為名牌包包而錯過咁好嘰男仔，過來人真係覺得唔值得啊！

aleah.s

下次你d friend又問你，你同佢地講"追求奢侈品嘅人有好多係自卑所以要用貴野去托起自己", "一個真正愛你嘅男人係會你M痛都識關心照顧你，放工幾攰都會搵你食飯，以結婚為前題同你一齊，為兩個人嘅將來計劃同打算，而唔係不合理地使錢買d無謂嘢".

如果你都識講覺得你男友係錫你，講嘢有道理，識講你自己唔追求d物質嘢，我希望你可以堅持自己嘅價值觀，唔好畀你呢d八婆朋友影響到。

好多女人鍾意同人比，呢種人係因為有d嘢唔抵得你，妒忌你，所以搵一d佢有你冇嘅嘢去銳住你，然後講d嘢令你自愧不如同埋質疑自己。希望你唔好中計，我覺得你d朋友就係覺得你男友成熟穩重，對你無微不至，但明知你唔會要求男友買名牌，而你男友思想成熟亦唔會戇居到為女人亂使d咁嘅錢，所以用呢樣嘢嚟銳你。講真點解要問你呢d嘢，關佢哋咩事？佢哋就係搵梗你嘅"弱點"去攻擊你，萬一你畀佢地影響到覺得呢樣真係你嘅弱點，你所缺少嘅嘢，佢哋就會捉住唔放。想問下呢個話題佢哋只係無意中講一次定成日都會喺你面前提起？睇清楚呢d係haters嘅tactic, 唔好上當，對你自己同男友都要有信心，唔好將自己價值觀降格到同你呢d朋友一樣，同埋少d同呢d所謂朋友來往。

Dunblide

Sis,
我係一個男生， 已婚6年

你要記得所有人都係憎人富貴厭人窮， 你班好姊妹有可能羨慕你所以講一啲嘢令到你對你男友有疑惑。

如果你男友唔買奢侈品畀你，有可能佢係為咗結婚所以儲多啲錢令到你可以有一個夢寐以求嘅婚禮，或者買樓。
加上呢個年頭最興係minimalist 極簡主義, 斷捨離
我完全同意你男友講法， 通常要求奢侈品嘅都係因為對自己冇信心

你要求佢買奢侈品畀你之前你望一望佢係唔係成日換電話， 買新玩具， 買新遊戲機，遊戲game之類的
如果沒有，請你好好珍惜呢個男人， 因為佢為咗你而唔去買佢認為啱佢嘅奢侈品
可能將來幾個月就要同佢好好傾下為咗將來嘅儲錢計劃
例如每人每個月儲1萬蚊 (as an example, you can adjust accordingly)
喺香港生活冇錢係萬萬不能， 所以佢慳啲為咗同你喺埋一齊嘅將來？ 呢方面你可以同佢傾下
如果個答案係為咗同你將來呢，呢位男士會保護你一生一世。

我衷心祝福妳和你男友有一個幸福快樂的將來。

Dunblide

Sis,
https://youtu.be/XJMF8R5NDoA

呢度有生老餅歌我想介紹畀你聽
1977年出，老過好?

首歌叫做how deep is your love
佢係講 戀愛係兩個人嘅事， 叫其他人唔好插手

你問人意見係可以呀， 但係自己都要filter同埋問問自己究竟make sense？
隔住個mon我唔知道你班姊妹同你男朋友係咩人
但係一個男人通常女人m到嘅時候係最棘手
你話畀我聽你男友喺你m到嘅時候都好好地照顧你， 我就覺得呢位男士係你嘅dream Man

如果你m到嘅時候佢都可以照顧到你無微不至
試想下當你同佢生小朋友嘅時候佢會點樣做， 我相信都係無微不至
唔使你半夜起身去照顧bb， 佢會起身沖奶粉畀小朋友飲
幫佢換紙尿片， 唔嫌污糟
真係好難得㗎， 有好多男人見到你m到佢寧願去打機
費事理你

How deep is your love?
我希望首歌可以畀到你一啲啟示?

兩情相悅已經非常之困難， 仲要搵一個已經隔咗成年都對你咁好嘅男人， 呢個男人真係要好好地hold著

大把女人同你爭呢個火星人呀
加油sis